|
Ikjefjord på nett.
[ Grendahuset ] [ Julemesse 2000 ] [ Ungdomslaget ] [ Idrettslaget ] [ Firkløveren 4H ] [ Skule og barnehage ] [ Utmark ] [ Stort og smått ]
Eikeneset Feriehytte
| |
|
Av: Bjarte Myren |
|
Kultur
og arrangement:
10. februar skipa lokale eldsjeler til
skidag for småe på bøen til Norvald og Veslemøy. Det var i knappaste laget
med snjo, og dagen etter var den vekk. Likevel fekk dei frammøtte
prøve seg både i og utanfor løypa.
Skjærtorsdag 12. april var ein
travel dag òg dette året. På ettermiddagen var det basar med gevinstar
av alle slag. Oppmøtet var bra, og overskotet likeeins. Dette året gjekk
det dessutan an å kjøpe lodd her på Ikjefjord på nett. (To gevinstar
vart vunne av dei som handla elektronisk.) Alle kronene gjekk til
grendahuset, som dermed kom ut med positive tal i rekneskapen.
Om kvelden tok dei yngste danseskoa på, og svinga seg til takter av Led
heads. Dette er ei gruppe som veit kva vår tids danseløver vil ha,
og stemninga i salen var nesten som i "gamle" dagar.
17. mai vart
dette året feira med Brekke skulemusikkorps fyrst i toget, noko som
medførte endringar i programmet. For at dei skulle rekke over alle
oppdraga, laut dei begynne hjå oss, og då nytta det ikkje å begynne til
"vanleg" tid. Festnemnda nytta dette godt, og baud likegodt på
skikkeleg kjøtkakemiddag i tillegg til den uunnverlege mylsa til Herdis.
Dette såg ut til å slå godt an. Kari Brekken heldt årets tale, - og
frysen var full av is.. Omlag 60 fekk med seg denne høgtida.
Festen heldt fram om kvelden med underhaldning, konkurransar og leikar, og
frammøtet var på rundt 80. Skyene trua litt tidleg på dag, men trekte
seg gradvis unna.
2.-3. juni var dei gjestfrie
Ikjefjordingane vertskap for Kyrkjebø Skule- og Ungdomskorps. Dei
avslutta korpsåret med ein turné på sørsida av kommunen. Hjå oss fekk
dei heile grendahuset med alle fasilitetar til disposisjon, og som takk
gav dei bygdefolk og tilreisande ein flott konsert på sundagen.
Jonsokafta vart ein knalldag - sol, varme stille, og -
myggfritt. Omlag 80 møtte.
Haustfesten til Firkløveren 4H
den 14. oktober samla fullt grendahus med folk frå Oppedal og Ikjefjord. I
år var det 27 medlemar som hadde stilt ut resultatet av oppgåvene dei hadde hatt dette
året. Dei baud òg på mat og underhaldning.
2. juledag vart ein vedunderleg
vinterdag med nysnjo og klårvêr. Prost Geir Sørebø stod for det
åndelege, og skule- og barnehageungane for det kulturelle. Festen vert
kanskje best hugsa for den nye
Meir om ungdomslaget sine arrangement finn du her.
|
|
Til toppen |
|
Miljøtiltak:
Arbeidet med planlegging av Områdetiltak i Ikjefjord var inne i
sitt siste av i alt tre år. Eit år kor fokuset var på gjennomføringa
av påbegynte tiltak. På Granden vart alt det tunge maskinarbeidet
unnagjort, og i Vassdalen kom ein godt i gang med prosjektet Vassdalsvatnet
rundt. I arbeid med fiskekultivering av vatnet tok ein i bruk storruse
og oppdrettsmære for å kunne selje fisken til BKK. Av ulike årsaker som
ein veit, og sikker nokon som ein ikkje veit, vart fangsten ikkje som
forventa.
Arbeidet med å finne ut korleis ein skulle få rydda opp i dei gamle
sandtaka gjorde framsteg. Alle papir vart det orden på, og kommunen har
budsjettert med pengar til gjennomføringa. I "Svåsandanlegget"
vart det begynt med skogrydding.
|
|
|
Til toppen |
|
Folketalsutviklinga
var ein smule negativ dette året. Dei som året før hadde flytta inn,
flytta no ut att. Ein ungdom flytta austover, medan andre tok til på
vidaregåande- og høgare utdanning. Me må berre håpe dei kjem klokare
att seinare!
Ingen nye kom til verda (men ein er i kjømda), og eit langt liv tok
slutt: Betsy Laila Brekken f. 1887 døde den 9. desember.
|
|
|
Til toppen |
|
Vekst
og vêr:
Brrrr for ein kulde! Ikkje sidan Per Myren feira 50 år
nyttårsafta 1978 har det vore så kaldt i Ikjefjorden. Kaldast var det
den 5. februar då ein enkelte stader målte -17 grader. Men kaldt vêr er
ikkje berre til plage: Det var tåe, slik at isen på Vassdalsvatnet vart
blank og sterk. Mange prøvde seg på skeiser, og underteikna våga seg
utpå med traktoren.
Telen sat lenge i, og ikkje før langt ut i april var det råd å prøve plogen.
Sidan var det vekslande tilhøve under våronna, men 1. halvdelen av mai
var flott. Då var det ergeleg at Felleskjøpet ikkje klarte levere frø i
tide..
Juni var brukbar medan det i juli og august var noko meir fuktig. Dette
skapte store vanskar med 2. slåtten for fleire, og grasavlingane
varierte frå gode til under middels. Kvaliteten vart nok for alle litt
redusert.
Grunna lite snjo i fjellet, vart det heller tidleg haust der. Der var på
det jamne med molter, men store, fine blåbær. Nede i liene
var det mindre med den sorten. 2001 var på det næraste eit uår for jordbær,
og dei var vanskeleg å oppdrive.
|
|
|
Til toppen |
|
På
bygningsfronten
I fjosen i Nedre Myra skjedde det store omveltingar. Som den siste
som la inn røyrmjølkeanlegg, kunne Bjarte no skilte seg med å vere den fyrste
i bygda med vaskeautomat, mjølkemåling og automatisk avtaking. Ein
heller stor overgang frå å mjølke i spann
Anneks er "inn" for tida. Fam. Sørevik i Sandvika tok dette
året til på sitt. Ei fullt utstyrt hytte på vel 40 m2.
Terrassefeberen rådde enno, og både på Brekka og på Teigane vart det
sett i gang arbeid med slik trivnadsflate. |
|
|
Til toppen |
|
Litt forskjellig
Etter å ha lege brakk i nærare 30 år, vart
bøane rundt tjørna i Ytre Trædalen slegne. Henny og Terje, som no er
dei einaste bøndene i Trædalen, skal framover bruke òg desse bøane til
fôrdyrking og beite for sauene sine. På denne måten er no alle
Trædalsbøane tekne i bruk att.
Då tunnelen gjennom Ramberget kom i 1989 vart gamlevegen rundt gjort om
til privat veg, og har sidan lege urørd og ustelt. Men våren 2001 tok
vegeigarane seg saman og fekk reinske den elles så koselege vegstubben
for nedfall og groe.
På Inngjerdsla har dei ein Kanal på tvers av flatene.
I 2001 vart det lagt ned ein god del arbeid med å reinske opp, og pynte
langs denne.
Heilt mot slutten av året tok arbeidet med å skifte ut
gamle og montere nye vegljos i bygda til, og til jul var Ikjen vorte langt
ljosare på kvelds- og nattetid enn før. I alt skulle det setjast opp
omlag eit dusin nye lyspunkt og alle dei gamle skulle bytast ut med
flunkande nye fotocellestyrte armaturar
|
 |
|
Til toppen |
|
|
