Ikjefjord Grunneigarlag vart skipa i 1999. Laget har som føremål å organisere felles jakt-, fiske- og beiterettar i utmarka til gardane 109 Årnes. 110 Kroken, 111 Brekken, 112 Myren og 113 Indre Tredal. I tillegg skal laget forvalte andre felles rettar og grunn, vedlikehalde felles vagar, og vere retningsgjevande i saker som vedkjem hyttebygging og anna friluftsbruk innanfor laget sitt område. Ikjefjord Grunneigarlag arbeider for å gjere utmarksrettane meir tilgjengelege for ålmenta på ein slik måte at det gir grunneigarane inntekter.

Laget har i år desse tilboda: vekekort for rypejakt og årskort for stangfiske i fjellvatn. Eit anna tilbod som blir vurdert er døgnkort for garnfiske i fjellvatn.
Utanom dette er det i dag også utleige av sauebeite, årskort på rypejakt, og hjortejakt. Hjortejakta vert leigd ut til Hestebotnbruna jaktlag. Der kan du vere med som gjestejegar. Ta i so fall kontakt med: Bjarte Myren.

Fjøra i Ikjen treng ei andletslyfting, og det er sett igang  arbeid med å planlegge framtidig utsjånad. Ansvarleg for dette arbeidet er Dagfinn Myren. Ta kontakt om du er interessert i båtplass!

Tilbod frå Ikjefjord Grunneigarlag:

Stangfiske i fjellvatn:

Desse vatna er med i ordninga:
Myre-stølsvatnet,
Holedalsvatnet,
Strandevatn,
Kvangrøvatn (nord for fylkesgrensa),
Årnes-stølsvatna,
Pinslevatnet.

Fiske i Vassdalsvatnet er inntil vidare gratis.

Abonner på fiskekort!
Fiskekortet kostar kr 150,- pr år, og som abonnent, får du i tillegg høve til å fiske med eit garn i desse vatna: Vassdalsvatnet, Årnes-stølsvatna og Pinslevatnet. Dersom det er fleire i familien som vil fiske, kan de kjøpe eit familiekort til kr 300,-. Ta kontakt med laget.

I fjellet er det og utplassert kvite og grøne postkassar på veg til- eller ved  vatnet du vil fiske i. Der skal det vere ei liste du kan skrive deg på for å abonnere på fiskekort. I løpet av sesongen vil du så få tilsendt eit personleg, laminert fiskekort. Det kan og førekome direkte sal ved vatna, og ved skilting i bygda. Kortet skal takast med på fiske for kontroll. God tur!

PS: Laget brukar i desse dagar betydelege summar på opprusting av vegar til utmarka, og til fiskekultivering i Vassdalsvatnet. Kjøp fiskekort, og støtt opp om tiltaka!

Her kan du betale fiskeavgift til staten.

Garnfiske i fjellvatn:

SUPERTILBOD: 
4 garn i ei helg for kr 100,- i Årnes-stølsvatna og Pinslevatnet. Fiskane skal målast og vegast, og resultatet skal meldast til laget sin kontaktperson.

Dersom du er interessert: ta kontakt med laget for meir detaljar.

Rypejakt:

Alle årskort for ein jegar med ein hund og eit gevær er selde. 
Men me har to vekekort i omløp. Desse har som vilkår at det ikkje skal brukast hund, og er avgrensa til det sørlegaste området til laget. Prisen er kr 300,- for sju dagar.

Korta skal takast med på jakt for kontroll, og sendast / leverast laget sin kontaktperson etter at jakta er over, påført fangstresultat og observasjonar.

Kontakt laget  for å bestille kort.