26.desember vakna vi til kvitkledt
landskap, snø i lufta og
julestemning i dungevis; den perfekte ramma rundt den tradisjonelle
juletrefesten. Trass i dette var det færre folk enn det pla vere, men då
var det ekstra flott at utflytte Ikjefjordingar frå nabobygdene møtte
opp!
Dagen starta med at konferansier Terje
Instefjord ynskte velkommen, etter dette viste skule- og barnehageungane
eit flott stykke om Papapanov si jul.
Utruleg bra framført når ein tenkjer på at det her var born heilt ned
til 4 år i aksjon.
 Vidare
fekk vi erfare sangtalentet til Stig Magne Røkenes Brekken. Han sang to
flotte julesangar, slik vi aldri har høyrt han før.
Sokneprest Thor Pundsnes heldt sin aller siste andakt i prostiet før
han flyttar sin veg.
 No
var det klart for gang rundt juletreet, og små og store samla seg om den
flotte grana. Dei gode, gamle julesangane har enno ikkje gått i gløymeboka.
 Kvar
familie hadde med seg litt mat som vi samla på eit koldtbord, slik at det
vart noko for ein kvar smak. Under maten var det tid til småprating og
loddsalet gjekk strykande.
 No
var det tid for nok ein hyllest av juletreet, i håp om at dette ville
lokke fram nissen. Og jammen kom han ikkje i år og, med snopeposar til
alle små og store, snille barn. Når nissen reiste, vart salen sakte men
sikkert tom.
|
|
